Marèdrèt, c’è-st-on bia p’tit viladje di 360 djins (189 coméres èt 171 omes, au prumî d’ janvier deûs mile cinq) qu’a faît s’ nid à l’ cwane do Condroz (Walonîye, Bèljique).

Qui vos d’mèroche à Marèdrèt ou bin tot simplèmint vos-î v’nu pormwinrner, vos vièroz on vraî viladje d’èmon nos-ôtes; dès maujones qu’ont stî faîtes avou lès pîres qui nos roketeûs ont tiré foû d’ nos câriéres.

Marèdrèt : on vrai p’tit pièle discôpé dins on bia cwin d’ nosse Molignéye, one aîwe qui va rabrèssî Moûse au d’bout di s’ voyadje.

Tot l’ monde vos dîrè qu’il î faît si bia, èt vos v’nu conter totes sès ritchèsses.

Marèdrèt, on l’ coneut ètot po-z-awè seû rachoner dès djins qu’ mètenut leûs mèstîs à l’oneûr.


On bia viladje, Marèdrèt !

Madame Denise Mathot (qui prov’neut d’èmon nos-ôtes, divant d’aler d’mèrer à Fosses) lî faît oneûr dins s’ powésîye Sov’nances. Ci bia bokèt-là a parètu dins lès bèlès pâjes di nosse gazète LE MOLIGNARD N°4 – 1982 – OCT. - NOV. - DEC. - page 98.

 

Sov’nances

Mi p’tit viladje, t’èsteûves si bia
Avou tès vôyes plin.nes di potias,
Tès maujos d’ pîres èt leûs spaliés
Qui lès tayons avin.n’ planté
Po-z-awè dès pwâres à l’awan.
Qui t’èsteûves bia ! Gn-a cinquante ans !

Qu’il èsteûve bia t’ ri cotwârdu
Courant d’zos l’ pîd dès vîs sayus !
Est-ç’ qu’il î èst co, l’ gros cayau
Jusse laudje assèz po lès sabots
Dès feumes qui spaumin.n’ leû buwéye
Blankîye à l’ rimouye su l’uréye ?

Dji r’veu tès sapins, tès bôlis,
Li sauvadje pilé su l’ Monti
Au mârs, lès djanès tchaubaréyes
Qui nos-alin.n’ coude à l’ vièspréye,
Dins l’ craye d’on meur, li nid d’ masindjes,
Po l’ vôy, nos gripin.n’ come dès sindjes !

Tènawète, nos fyin.n’ li malade
Po-z-alè au tchamp avou l’ gade
Qui nos mwinrnin.n’ dins lès ruwales
Di l’aye dès Saurts ou bin dès Stiès.
Nos-î cheûyin.n’ totes lès purnales
Bin longtimps d’vant qu’i gn-eûche djalè !

Si dji m’ sovin dè l’ tchirouterîye ?
Taîje-tu one miète ! Ti m’ dones l’invîye
D’one bone pougnîye di pâtes di pomes,
Bin rossètes, clapant totes èchones.
Adon, à l’ saîson do cûjadje,
On sinteut l’ pome dins tot l’ viladje.

Audjoûrdu, t’as brâmint candji.
T’ès "ârtisanal" à ç’ qu’on dit !
Ti n’ès pus come dins l’ timps : t’ès mia !
Di yèsse à l’ môde, ti m’ chones co pus bia !
Comint ç’ qu’on n’ sèreûve nin sot d’ twè,
Mi p’tit viladje di Marèdrèt ?

Denise Mathot (Fosses-la-Ville)


Po vikè èchone

Marèdrèt, on viladje
d'omes di mèstî

 

1. Portraît

D'èwou ç' qui nos v'nans ?

Marèdrèt, on viladje qui s’ nom vint di Merendrech ; ça vout dîre "passadje di frèchaud" (wé). Il a crèchu à faît, dins on fond do l’ valéye do l’ Molignéye (one rivêre qui s’ va foute è Moûse).

Nin lon èri d’ tos cès cwins là, faîts po l’s-ârtisses : l’abîye dès bènèdictines di Marèdrèt (Atèlier po fè dès lètrines di coleûr, mètu su pîds è 1893) ; l’abîye dès bènèdictins d’ Marèdsous (Scole di Mèstîs d’ârt, mètûwe su pîds è 1903). Dispû aviè 1960, li viladje a r’cî dès-ârtisans conus d’ laudje èt d’ long : Antonio Lampecco (maîsse-potî), Félix Roulin (sculteû su mètaus) èt Bernard Tirtiaux (maîsse-vèrî, ome di tèyâte, scrîjeû èt sculteû).

C’èst surtout grâce à Jacqueline èt Djan Vereycken-Adam qu’on-z-a c’minci à fè d’ Marèdrèt, on viladje qui rachone lès-ârtisans ; one saqwè qu’ tot l’ monde coneut bin asteûre. C’èst zèls qu’ont faît r’fè l’ancyin.ne ûsine di pâte di frûts, cide èt jèléyes (Li Pomerèye). C’èst vêlà qu’il ont mètu leû galerîye d’ârt A la fontaine (1961) èt leû muséye do bwès èt d’ nosse vicadje di tos lès djoûs [musée du Bois et de la Vie rurale (1967)].

Lès-ârtisans qui travayenut à Marèdrèt, èt co quétefîye î d’mèrè, vol’nut à tote fwace fè one saqwè d’ bia, po vos l’ fè paurtadji èt vos l’ mostrè.


Èwou ç’ qui n’s-alans ?

Dispûs todi, lès djins d’ Marèdrèt ont seû aurdè l’ fameûs patrimwin.ne qu’on l’zî aveut d’nè. C’èst po ça qu’i sowaîtenut ècoradji lès-ârtisans qu’ont v’nu d’mèrè dins leû viladje. C’èst po ça èto qu’i r’cîyenut todi tos lès novias-ârtisans qu’ont lès min.mès-idéyes.

Tot mostrant l’impôrtance dès mèstîs d’ârtisans dins l’ vikérîye d’on viladje, tot Marèdrèt s’a bien promètu qui l’ 21è siéke causerè co d’ li.

Prinde one vôye què lès va minrnè pus lon ! Lès djins d’ Marèdrèt vol’nut rachonè dins l’ min.me pani : lès mèstîs qui fèyenut vikè, li plaîji d’ fè ça èchone, dins on payisadje qu’on ’nn’a sogne. Trwès-idéyes qu’on n’ saureut r’ssatchi one di l’ôte sins machurè l’ bèle imaudje d’on viladje come i gn-a pont.

Binaujes èt fiérs, lès djins d’ Marèdrèt, do p’lu r’cîre tos lès cis qu’acourenut veûy leû bia payis. Mins seûlemint à one condicion : qu’on rèspèctéye leû viladje qu’èst si bia, qu’èst si ritche èt qu’on-z-î èst si bin.
 

2. Noste idéye

Nos vôrins télemint bin :

- pa on calendriyer di tot ç’ qui s’ passe dins nosse viladje

- pa tot ç’ qu’anonce lès novèles, o djoû d’odjoûrdu : causadjes, gazètes, radio,   tèlèvisions, intèrnèt,...-

- pa tos lès djins d’ Marèdrèt èt tos sès-ârtisans

po qu’on-z-eûche l’idéye di v’nu veûy tot ça.

- pa sès bias batimints èt l’ nature qui n’s-avans tot-autoû

- pa s’t-îstwêre

- pa sès djins èt sès-ârtisans qu’on rèscontère

po fè conèche nosse viladje.

- pa sès reuwes bin prôpes

- pa sès djins amich’tauves

- pa sès-ârtisans

po yèsse vraîmint dins l’ vîye di nosse viladje.

- pa totes lès novèlès-idéyes qui nos pôrins awè

- pa ç’ qui nos-apwaterans à tot ç’ qu’èst d’dja faît

- pa tos lès loyins qui n’s-aurans avou lès cis qui boutenut

po fè vikè nosse viladje, todi one miète pus fwârt.
 

3. Valeûrs

Si plaîre à Marèdrèt dins l’ vicadje di tos lès djoûs come à l’ocâsion d’ cès fièsses là qu’on faît po l’ culture oubin po lès mèstîs d’ârt, ça nos-ègadje à paurtadji tot ça avou l’s-ôtes :

Vikè èchone, c’èst :

Ricîre, c’èst :

Rèspèctè, c’èst :

Sawè fè, c’èst :

Ôrganisè, c’èst :

 

 

 


 
Marèdrèt, li viladje da Djan-Leup

 
 


Djan-Leup.
 
 

 
 
CAUSER L' WALON ?
RIN D' PUS AUJI !

Scole di walon